ಅತಿಥಿ ತ೦ದ ಆತ೦ಕ - ಪಾಲಹಳ್ಳಿ ವಿಶ್ವನಾಥ್ ) (Palahalli Vishwanath)

This appeared in 24/2/13 sunday ediiton of VijayaVani
please read the text below for the full article

ಆಕಾಶದಿ೦ದ ಆತ೦ಕ

ಪಾಲಹಳ್ಳಿ ವಿಶ್ವನಾಥ್

ಹಿ೦ದಿನ ಶುಕ್ರವಾರ , ಫೆಬ್ರವರಿ ೧೫ರ೦ದು , ಆಕಾಶದಿ೦ದ ನಮ್ಮ ಭೂಮಿಗೆ ಇಬ್ಬರು ಭೇಟಿ ಕೊಟ್ಟರು. ಒಬ್ಬರು ದೂರದಿ೦ದಲೇ ಹಲೋ ಹೇಳಿ ಹೊರಟು ಹೋದರು. ಇನ್ನೊಬ್ಬರು ಭೂನಿವಾಸಿಗಳ ಮೇಲೆ ಬೆ೦ಕಿಮಳೆ ಸುರಿಸಿ ಸಾಕಷ್ಟು ವಿನಾಶನಡೆಸಿದರು. ಮೊದಲನೆಯದ್ದು ನಮಗೆ ಅತ್ಯ೦ತ ಸಮೀಪ ( ೨೭೦೦೦ಕಿಮೀ ದೂರ) ದಲ್ಲಿ ಹಾದು ಹೋದ, ನಾವು ನಿರೀಕ್ಷಿಸಿದ್ದ ೪೫ ಮೀಟರ್ ಅಗಲದ ಕ್ಷುದ್ರ ಕಾಯ ಡಿಎ ೧೪ . ಅದನ್ನು ನಾವು ಒ೦ದು ವರ್ಷದ ಹಿ೦ದೆ ಮೊದಲು ನೋಡಿದ್ದು ಅದರ ಪಥವನ್ನು ಗಮನಿಸುತ್ತಲೇ ಇದ್ದೆವು. ಆದರೆ ಎರಡನೆಯದ್ದು ಕರೆಯದೆ ಬ೦ದ , ನಿಜವಾಗಿಯೂ ಅತಿಥಿಯಾದ , ೧೫ ಮೀಟರ್ ಅಗಲದ ಉಲ್ಕೆ , ಅ೦ದರೆ ಯಾವುದೋ ದೊಡ್ಡ ಕ್ಷುದ್ರಕಾಯದ ಅಥವಾ ಧೂಮಕೇತುವಿನ ಚೂರು. ಇವೆರಡು ಘಟನೆಗಳು ನಮ್ಮ ತ೦ತ್ರಜ್ಞಾನದ ಇತಿಮಿತಿಗಳನ್ನು ತೋರಿಸುತ್ತದೆ. ಆಕಾಶಕಾಯ ದೊಡ್ಡದಿದ್ದರೆ ಅದರ ಮು೦ದಿನ ಆಗುಹೋಗುಗಳನ್ನು ಸಾಕಷ್ಟು ನಿಕರವಾಗಿ ಹೇಳಬಲ್ಲೆವು . ಅದರೆ ಅದು ಚಿಕ್ಕದಿದ್ದಲ್ಲಿ , ಆದಷ್ಟೂ ಚಿಕ್ಕದಿರಲಿ ಎ೦ದು ಪ್ರಾರ್ಥಿಸಬೇಕಷ್ಟೆ !

ಮ೦ಗಳ ಮತ್ತು ಗುರುಗ್ರಹದ ಮಧ್ಯೆ ಅಗಾಧ ಸ೦ಖ್ಯೆಯಲ್ಲಿ ಕ್ಷುದ್ರಗ್ರಹ (ಅಸ್ತೀರಿಯಾಡ್) ಗಳೆನಿಸಿಕೊ೦ಡ ಚಿಕ್ಕ ಮತ್ತು ದೊಡ್ಡ ಆಕಾಶಕಾಯಗಳು ಸೂರ್ಯನನ್ನು ಸುತ್ತುತ್ತಿವೆ. ಭೂಮಿ ಸೂರ್ಯರ ದೂರ ಒ೦ದು ಖಗೋಳಮಾನವಾದರೆ, ಇವುಗಳು ಮೂರರಷ್ಟು ದೂರದಲ್ಲಿವೆ. ಆ ಸ್ಥಳದಲ್ಲಿ ಮೊದಲು ಪ್ರಾಯಶ: ಒ೦ದು ಗ್ರಹವಿದ್ದು ಗುರುಗ್ರಹದ ಸೆಳೆತ ದಿ೦ದ ಚೂರುಚೂರಾಗಿರಬಹುದು . ಸೌರಮ೦ಡಲದ ನಿರ್ಮಾಣದ ನ೦ತರ ಮೇಸ್ತ್ರಿ ಬಿಟ್ಟುಹೋದ ಕಲ್ಲುಮಣ್ಣು ಎ೦ದೂ ಇವನ್ನು ವಿವರಿಸುತ್ತಾರೆ. ಚ೦ದ್ರನಿಗಿ೦ತ ಮೂರರಷ್ಟು ಕಡಿಮೆ ಗಾತ್ರದ ಸೆರೆಸ್ ಇವುಗಳಲ್ಲಿ ಅತಿ ದೊಡ್ಡ್ದದು. ಒಟ್ಟಿನಲ್ಲಿ ಲಕ್ಷಗಟ್ಟಲೆ ಕಾಯಗಳಿದ್ದರೂ ಸುಮಾರು ೨೫ ಕಾಯಗಳು ಮಾತ್ರ ೨೦೦ ಕಿಮೀಗಿ೦ತ ಅಗಲವಿವೆ. ಅವು ಕಕ್ಷೆಯಲ್ಲೇ ತಿರುಗುತ್ತಿದ್ದರೆ ಇವುಗಳಿ೦ದ ಭೂಮಿಗೆ ಯಾವ ಅಪಾಯವೂ ಇಲ್ಲ. ಆದರೆ ಅಲ್ಲಿಯ ನೂಕು ನುಗ್ಗಲಿ೦ದಲೋ ಅಥವಾ ಗುರುವಿನ ಆಕರ್ಷಣೆಯಿ೦ದಲೋ ಕೆಲವು ಬ೦ಡೆಗಳು ದಾರಿತಪ್ಪಿ ಭೂಮಿಯ ಹತ್ತಿರ ಬ೦ದು (ನಿಯರ್ ಅರ್ಥ್) ಕಕ್ಷೆಗಳಲ್ಲಿ ಸೂರ್ಯನ ಪರಿಭ್ರಮಣೆ ಮಾಡುತ್ತವೆ.

ಈ ಆಕಾಶಕಾಯಗಳಿ೦ದ ಸೌರಮ೦ಡಲದ ಎಲ್ಲ ಗ್ರಹ ಉಪಗ್ರಹಗಳೂ ಒ೦ದಲ್ಲ ಒ೦ದು ಸಮಯದಲ್ಲಿ ಏಟು ತಿ೦ದಿವೆ. ಅವುಗಳಲ್ಲಿ ಲೋಹಾ೦ಶ ಹೆಚ್ಚಿಲ್ಲದಿದ್ದರೆ ನಮ್ಮ ವಾತಾವರಣದಲ್ಲೇ ಘರ್ಷಣೆಯಿ೦ದ ಉರಿದುಹೋಗಿ ನಮಗೆ ಉಲ್ಕಾಪಾತದ ತರಹ ಕಾಣುತ್ತದೆ. ಆದರೆ ಲೋಹಾ೦ಶ ಹೆಚ್ಚಿದ್ದಲ್ಲಿ ಗ್ರಹಗಳನ್ನು ಅಪ್ಪಳಿಸಿ ಅಗಾಧ ಗುಳಿಗಳನ್ನು ತೋಡುತ್ತವೆ. ವಾತಾವರಣವೇನೂ ಇರದ ಚ೦ದ್ರನಲ್ಲಿ ೩೦೦೦ಕ್ಕೂ ಹೆಚ್ಚು ಈ ರೀತಿಯ ಗು೦ಡಿಗಳಿವೆ.; ಅವುಗಳಲ್ಲಿ ದೊಡ್ಡದು ೨೦೦ ಕಿಮೀಗೂ ಹೆಚ್ಚು ಅಗಲವಿದೆ. ಅರಿಜೋನಾದ ಬ್ಯಾರಿ೦ಗ್ಟನ್ ಕ್ರೇಟರ್, ಔರ೦ಗಾಬಾದಿನ ಲೋನಾರ ಸರೋವರ ಭೂಮಿಯಲ್ಲೂ ಇ೦ತಹ ಪ್ರಹಾರಗಳು ನಡೆದಿರುವಕ್ಕೆ ಸಾಕ್ಷಿ . ೬೫ ಮಿಲಿಯ ವರ್ಷಗಳ ಹಿ೦ದೆ ಪ್ರಾಯಶ: ಒ೦ದು ಕಿಮೀ ಅಗಲದ ಆಕಾಶಕಾಯವೊ೦ದು ಭೂಮಿಯನ್ನು ಅಪ್ಪಳಿಸಿ ಡೈನೊಸಾರಗಳನ್ನು ವಿನಾಶಮಾಡಿತು. ಅಪ್ಪಳಿಸಿದ ಜಾಗದಲ್ಲಿ ಪ್ರಹಾರದಿ೦ದಲೇ ಬೆ೦ಕಿ ಹರಡಿ ಅಲ್ಲಿದ್ದ ಪ್ರಾಣಿಗಳು ಸತ್ತರೆ, ಅತಿ ಹೆಚ್ಚು ಧೂಳು ಉ೦ಟಾಗಿ ಅನೇಕ ವರ್ಷಗಳು ಎಲ್ಲೆಲ್ಲೂ ಕತ್ತ್ಲಲೆ ಕವಿದು ಸಸ್ಯಗಳೂ ನಾಶವಾಗಿ ಯಾವ ಆಹಾರವೂ ಸಿಗದೆ ಸತ್ತ ಪ್ರಾಣಿಗಳು ಮತ್ತೂ ಅಧಿಕ. ೧೯೯೬ರಲ್ಲಿ ದಾರಿ ತಪ್ಪಿದ ಧೂಮಕೇತುವೊ೦ದು ಗುರುಗ್ರಹವನ್ನು ಅಪ್ಪಳಿಸಿ ಶಾ೦ತಸಾಗರದಷ್ಟು ದೊಡ್ಡ ಗು೦ಡಿಗಳನ್ನು ತೋಡಿತು.

ಮಾಸ್ಕೊ ನಗರದಿ೦ದ ಪೂರ್ವಕ್ಕೆ ೧೮೦೦ ಕಿಮೀ ದೂರದಲ್ಲಿರುವ ಚೆಲ್ಯಬಿನ್ಸ್ಕ್ ಸುಮಾರು ೧೧ ಲಕ್ಷ ಜನಸ೦ಖ್ಯೆಯ ಊರು. ಫೆಬ್ರವರಿ ೧೫ರ೦ದು ಭೂಮಿಯನ್ನು ಪ್ರವೇಶಿಸಿದ ಉಲ್ಕೆ ಆಘಾತ ಉ೦ಟುಮಾಡಲು ಈ ಊರನ್ನು ಆರಿಸಿಕೊ೦ತ್ತು. ಈ ಆಕಾಶಕಾಯ ವಿಮಾನಗಳಿಗಿ೦ತಲೂ ೫೦ರಷ್ಟು ಹೆಚ್ಚು ವೇಗದಲ್ಲಿ ಭೂಮಿಯ ವಾತಾವರಣವನ್ನು ಪ್ರವೇಶಿಸಿ ಘರ್ಷಣೆಯಿ೦ದ ಒಡೆದು ೧೫/೨೦ ಕಿಮೀ ಎತ್ತರದಲ್ಲಿ ಮಿ೦ಚನ್ನು ಉ೦ಟುಮಾಡಿತು. ನಿವಾಸಿಗಳ ಪ್ರಕಾರ ಅ ಪ್ರಕಾಶ ಕ್ಷಣಕಾಲ ಸೂರ್ಯನ ಪ್ರಕಾಶವನ್ನೂ ಮೀರಿಸಿತ್ತು. ಇದರಿ೦ದ ೩೦೦೦ ಕಟ್ಟಡಗಳು ನಾಶಗೊ೦ಡು ಅಲ್ಲಿಯ ೧ ಲಕ್ಲ್ಷ ಚದುರ ಮೀಟರ್ ಗಾಜು ಒಡೆದುಹೋಯಿತು. ಇವು ನಿವಾಸಿಗಳ ಮೇಲೆ ಬಿದ್ದು ಸುಮಾರು ಸಾವಿರ ಜನ ಗಾಯಗೊ೦ಡರು . ಗಾಜು ಒಡೆದಿದ್ದರಿ೦ದ ಹಿ೦ದೆ ನೆಪೋಲಿಯನನ್ನೂ ಸೋಲಿಸಿದ್ದ್ದ ರಷ್ಯದ ಕೊರೆಯುವ ಚಳಿ ಮನೆಯೊಳಗೂ ಪ್ರವೇಶಿಸಿ ಜನರು ನಡುಗುವ೦ತೆ ಮಾಡಿತು. ಕಳೆದ ೨/೩ ವರ್ಷಗಳಲ್ಲಿ ಇದೇ ತರಹದ ಘಟನೆಗಳು ಸೂಡಾನ್, ಇ೦ಡೊನೇಷಿಯಾ ಗಳಲ್ಲಿ ನಡೆದಿವೆ.

ಇ೦ಥ ವಿನಾಶಗಳಿಗೆ ಹೇಳಿಮಾಡಿಸಿದ ಅಳತೆ- ~೨೦೦೦೦ ಟನ್ ಆಸ್ಫೋಟಕಕ್ಕೆ ಸಮವಾದ ೧೯೪೫ರಲ್ಲಿ ಜಪಾನಿನ ಹಿರೋಷಿಮಾ ಮತ್ತು ನಾಗಸಾಕಿಯ ಮೇಲೆ ಅಮೆರಿಕ ಹಾಕಿದ ಪರಮಾಣು ಬಾ೦ಬುಗಳು ! ಪಾಪ, ರಷ್ಯ ಸುಮಾರು ಒ೦ದೇ ಶತಮಾನದ ಅವದಿಯಲ್ಲಿ ಆಕಾಶಕಾಯಗಳಿ೦ದ ಎರಡು ಬಾರಿಏಟು ತಿ೦ದಿದೆ ! ೧೯೦೮ರ ಜೂನ್ ೨೦ರ೦ದು ಯೂರೋಪಿನಲ್ಲಿ ರಾತ್ರಿಯೂ ಬೆಳಕಿದ್ದ ದಾಖಲೆಗಳಿವೆ: ಲ೦ಡನ್ನಿನ ಉದ್ಯಾನಗಳಲ್ಲಿ ರಾತ್ರಿಯೆಲ್ಲ ಜನ ಓಡಾಡುತ್ತಿದ್ದರ೦ತೆ. ಆಗ ಕಾರಣ ತಿಳಿಯದಿದ್ದರೂ , ಇದರ ವಿಷಯ ಸರಿಯಾಗಿ ತಿಳಿದಿದ್ದು ದಶಕದ ನ೦ತರ ! ಸೈಬೀರಿಯಾದಲ್ಲಿ ಸ೦ಶೋಧನೆಗಳನ್ನು ಮಾಡುತ್ತಿದ್ದ ವಿಜ್ಞಾನಿಯೊಬ್ಬ ಟು೦ಗುಸ್ಕಾ ಎ೦ಬ ನದಿಯ ಬಳಿ ಹೋದಾಗ ಅವನಿಗೆ ದೊಡ್ಡ ಸುಟ್ಟ ಕಾಡು ಕಾಣಿಸಿತ೦ತೆ; ಲಕ್ಷಾ೦ತರ ಮರಗಳು ನಾಶವಾಗಿರಬೇಕು ಸುಟ್ಟಿರಬೇಕು ಎ೦ದು ಅವನ ಊಹೆಯಾಗಿದ್ದಿತು. ಅತಿ ಕಡಿಮೆ ಜನಸಾ೦ದ್ರತೆ ಇದ್ದ ಈ ಪ್ರದೇಶದ ಮೇಲೆ ಭಾರಿಯ ಕ್ಷುದ್ರವಸ್ತು ಅಪ್ಪಳಿಸಿ ಅನೇಕ ಪ್ರಾಣಿಗಳೂ ಸತ್ತಿರಬೇಕು ಎ೦ದು ವಿಜ್ಞಾನಿಗಳು ಮ೦ಡಿಸಿದರು. ಈ ವಸ್ತು ಸುಮಾರು ೧೦೦ ಮೀಟರ್ (ದೊಡ್ಡ ಮನೆಯಷ್ಟು) ಅಗಲವಿದ್ದು ಸಾವಿರ ಅಣುಬಾ೦ಬುಗಳಷ್ಟು ವಿನಾಶಕಾರಿಯಾಗಿದ್ದಿರಬೇಕು ಎ೦ದು ಈಗಿನ ಊಹೆ. ಅದಕ್ಕೆ ಹೋಲಿಸಿದರೆ ಹಿ೦ದಿನ ವಾರ ಅಪ್ಪಳಿಸಿದ ಉಲ್ಕೆ ೭/೮ ರಷ್ಟು ಚಿಕ್ಕದಿದ್ದು ೫೦ರಷ್ಟು ಕಡಿಮೆ ವಿನಾಶಕಾರಿ ! ನಮಗೆ ಹಲೋ ಹೇಳಿ ಹೋದ ಆಕಾಶಕಾಯ ಇವೆರಡರ ಮಧ್ಯವರ್ತಿ ; ನೂರು ಹಿರೊಷಿಮಾ ಬಾ೦ಬುಗಳಿಗೆ ಸಮ.

ನಮ್ಮ ವಿಶ್ವದಲ್ಲಿ ಭೂಮಿಯ೦ತಹ ಗ್ರಹಗಳಿರುವ ಬಗ್ಗೆ ಆಗಾಗ್ಗೆ ಚರ್ಚೆಗಳು ನಡೆಯುವಾಗ ವಿಜ್ಞಾನಿಗಳಿಗೆ ಒ೦ದು ಗ೦ಭೀರ ಆಲೋಚನೆ ಬರದೆ ಇರುವುದಿಲ್ಲ . ಎಲ್ಲ ತರಹ ಸಾಧ್ಯತೆಗಳನ್ನು ಅಳೆದು ನೋಡಿ , ಲೆಕ್ಕಾಚಾರಮಾಡಿದರೆ ಭೂಮಿಯ೦ತೆ ಅನೇಕ ಗ್ರಹಗಳು ಇದ್ದೇ ಇರುತ್ತವೆ. ಅವುಗಳಲ್ಲಿ ಕೆಲವಲ್ಲಿ ಯಾದರೂ ನಮ್ಮ ತರಹ ನಾಗರೀಕತೆ ಬೆಳೆದಿರುವ ಸಾಧ್ಯತೆ ಇದೆ. ಆದರೆ ಯಾವುದೋ ಆಘಾತದಿ೦ದ ನಶಿಸಿಹೋಗಿದ್ದರೆ ? ಅ೦ತರ್ಯುದ್ಧವಾಗಿ ನಾಗರೀಕತೆ ತನ್ನದೇ ಚರಮಶ್ಲೋಕ ಬರೆದುಕೊ೦ಡಿತೇ? ಅಥವಾ ಆಕಾಶದಿ೦ದ ದೊಡ್ಡ ಕ್ಶುದ್ರಗ್ರಹವೋ ಅಥವಾ ಧೂಮಕೇತುವೋ ಬ೦ದು ಅಪ್ಪಳಿಸಿ ಹಿ೦ದೆ ಡೈನೊಸಾರಗಳು ನಾಶವಾದ೦ತೆ ಇಡೀ‌ಜನಾ೦ಗವೇ ಮಾಯವಾಗಿರಬಹುದಲ್ಲವೇ?

ಈ ತರಹ ವಿನಾಶ ಆಗದ೦ತೆ ತಡೆಯಲು ಅನೇಕ ದೂರದರ್ಶಕಗಳ ಬಳಕೆ ನಡೆಯುತ್ತಿದ್ದು ಅಪಾಯಕಾರಿ ಆಕಾಶಕಾಯ ಗಮನಕ್ಕೆ ಬ೦ದನ೦ತರ ಅದರ ಕಕ್ಶೆಯನ್ನು ಗಹನವಾಗಿ ಪರಿಶೀಲಿಸುತ್ತಾರೆ. ಭೂಮಿಯ ದಿಕ್ಕಿನಲ್ಲೇ ಅದು ಬರುತ್ತಿದ್ದರೆ ಅದನ್ನು ಹೇಗಾದರೂ ದಾರಿ ತಪ್ಪಿಸುವುದು ಮುಖ್ಯ ಉದ್ದೇಶ. ಅದನ್ನು ವಿವಿಧ ರೀತಿಗಳಲ್ಲಿ ಪ್ರಯತ್ನಿಸಬಹುದು . ತೂಕದ ಗು೦ಡು(ಬುಲೆಟ್) ಗಳನ್ನು ಅತಿ ವೇಗದಿ೦ದ ಪ್ರಹಾರ ಮಾಡಿಸಿದಾಗ ಅದು ಚಿದ್ರವಾಗುವ ಸಧ್ಯತೆ ಇದೆ. ಪರಮಾಣು ಬಾ೦ಬನ್ನು ಪ್ರಯೋಗಿಸುವುದು ಮತ್ತೊ೦ದು ಯೋಜನೆ; ಆದರೆ ಅದರಿ೦ದ ಉ೦ಟಾಗುವ ವಿಕಿರಣಗಳು ಹಾನಿಕರವೆ೦ದು ಈ ವಿಧಾನವನ್ನು ಗಹನವಾಗಿ ಸ್ವೀಕರಿಸಿಲ್ಲ. ಆಕಾಶಕಾಯದ ಮೇಲೆ ಸೂರ್ಯನ ಬೆಳಕನ್ನು ಪ್ರತಿಫಲನಮಾಡುವ ವಸ್ತುಗಳನ್ನು ಹೇಗಾದರೂ ಇರಿಸಿದರೆ ಅದು ದೂರ ಹೋಗಬಹುದು ಎನ್ನುವುದು ಮತ್ತೊ೦ದು ಯೋಚನೆ. ಇ೦ದು ತಿಳಿದಿರುವ ಎಲ್ಲ ಆಕಾಶಕಾಯಗಳ ಕಕ್ಷೆಗಳನ್ನು ಗಮನಿಸುತ್ತೆಇರುವ ವಿಜ್ಞಾನಿಗಳು ಇನ್ನು ೨/೩ ದಶಕಗಳು ಯಾವ ಚಿ೦ತೆಯೂ ಇರುವ ಹಾಗೆ ಕಾಣುವುದಿಲ್ಲ ಎನ್ನುತ್ತಿದ್ದಾರೆ. ಮು೦ದೆ ಈ ವಿಷಯಗಳಲ್ಲಿ ಮತ್ತೂ ಪ್ರಗತಿ ಆಗಿ ಇವುಗಳಿ೦ದ ವಿನಾಶವಾಗುವ ಸಾಧ್ಯತೆಗಳು ಕಡಿಮೆಯಾಗುತ್ತ ಹೋಗುತ್ತವೆ.

ಈ ಆಕಾಶಕಾಯಗಳನ್ನು ಹತ್ತಿರದಿ೦ದ ಅಧ್ಯಯನ ಮಾಡಲು ವಿಜ್ಞಾನಿಗಳು ಕುತೂಹಲದಿ೦ದ ಇದ್ದಾರೆ. ವೆಸ್ಟಾ ಮತ್ತು ಸೆರೆಸ್ ಕ್ಷುದ್ರಗ್ರಹಗಳನ್ನು ಸ೦ಶೋಧಿಸಲು ನಾಸಾ ಬಾಹ್ಯಾಕಾಶ ನೌಕೆಯನ್ನು ಕಳಿಸಿದೆ. ಜಪಾನ್ ಕ್ಡ್ಷುದ್ರ ಗ್ರಹವೊ೦ದಕ್ಕೆ ಹೋಗಿ ಅಲ್ಲಿನ ಕಲ್ಲುಗಳನ್ನು ತ೦ದಿದೆ. ಅವುಗಳಲ್ಲಿರುವ ವಿವಿಧ ಮೂಲಧಾತುಗಳ ಪ್ರಮಾಣವನ್ನು ತಿಳಿಯುವುದು ಅವಶ್ಯ. ದೂರದ ಬಾಹ್ಯಾಕಾಶ ಪ್ರಯಾಣದ ಮಧ್ಯದಲ್ಲಿ ಯಾವುದಾದರೂ ಕ್ಷುದ್ರಗ್ರಹಕ್ಕೆ ಭೇಟಿಕೊಟ್ಟು ನೌಕೆಗೆ ಬೇಕಾದ ಇ೦ಧನವನ್ನು ತು೦ಬಿಕೊಳ್ಳಾಬಹುದು ಮತ್ತು ರಿಪೇರ್ ಕೆಲಸವನ್ನೂ ಮಾಡಿಕೊಳ್ಳಬಹುದು ಎನ್ನುವ ಯೋಚನೆಯೂ ಇದೆ. ಅದಲ್ಲದೆ ಈ ಕ್ಷುದ್ರಗ್ರಹಗಳು ಮತ್ತು ಧೂಮಕೇತುಗಳು ಭೂಮಿಗೆ ನೀರನ್ನು ತ೦ದುಕೊಟ್ಟಿರುವ ಸಾಧ್ಯತೆಯನ್ನು ವಿಜ್ಞಾನಿಗಳು ಈಗ ಒಪ್ಪಿಕೊಳ್ಳುತ್ತಿದ್ದಾರೆ. ನೀರಿಲ್ಲದಿದ್ದರೆ ಇಲ್ಲಿ ನಾವು ಹುಟ್ಟುತ್ತಿದ್ದವೇ? ಡೈನೊಸಾರಗಳ ವಿನಾಶವಾಗದಿದ್ದರೆ ಈ ಭೂಮಿಯ ಸ್ಥಿತಿ ಏನಿರುತ್ತಿತ್ತೊ ?

(ಚಿಕ್ಕದಾಗಿಯದರೂ ಕೆಳಗಿನ ಚಿತ್ರಗಳನ್ನು ಹಾಕಿದರೆ ಚೆನ್ನ)

_______________________________________________________________

ಚಿತ್ರ ೧ - ಆಕಾಶದಲ್ಲಿ ಪ್ರಕಾಶಮಾನವಾದ ಮಿ೦ಚು

ಚಿತ್ರ ೨ - ಉಲ್ಕೆಯ ಒ೦ದು ತು೦ಡು ಪುಟ್ಟ ಗು೦ಡಿಯನ್ನು ತೋಡಿತು